बागमती प्रदेशका श्रम, रोजगार तथा यातायात मन्त्री जयराम थापाले मन्त्रालयलाई जनतामुखी र सेवा केन्द्रित बनाउने प्राथमिकता लिने बताएका छन् ।
सोमबार हेटौंडामा सञ्चारकर्मीहरूसँगको अन्तरक्रिया कार्यक्रममा बोल्दै मन्त्री थापाले मन्त्रालयको सम्पूर्ण कार्य जनतासँग प्रत्यक्ष सम्बन्धित भएकाले सेवाग्राहीलाई केन्द्रमा राखेर काम गर्नुपर्नेमा जोड दिए ।
उनले भने, ‘यो मन्त्रालय जनतासँग प्रत्यक्ष सरोकार राख्ने र सेवाग्राहीसँग जोडिने मन्त्रालय भएकोले आम नागरिकलाई केन्द्रबिन्दुमा राखेर काम गर्नुपर्ने कुरामा म, मन्त्रालय र मातहतका कार्यालयका कर्मचारीहरु प्रतिबद्ध छौं ।’
मन्त्री थापाले भाद्र २३ र २४ गते भएको ‘जेनजी’ प्रदर्शनबाट मन्त्रालय र मातहतका कार्यालयमा व्यापक क्षति पुगेको जानकारी समेत दिए । उनका अनुसार प्रदर्शनका क्रममा मन्त्रालय पूर्णरूपमा ध्वस्त भएको छ भने मातहतका १२ मध्ये चाबहिल र चितवनका कार्यालय पूर्ण क्षति र भक्तपुरस्थित राधेराधे तथा मकवानपुरस्थित हेटौंडा कार्यालय अर्ध क्षतिग्रस्त भएका छन् ।
आगजनीका कारण मन्त्रालयअन्तर्गतका करिब १ सय ९५ वटा सवारीसाधन जलेर नष्ट भएका छन् । तीमध्ये ५३ चारपांग्रे र १ सय ४२ दुईपांग्रे रहेका मन्त्री थापाले जानकारी दिए ।
सर्वसाधारणका सवारीसाधन पनि आगजनीमा परेकाले राहतस्वरूप विशेष व्यवस्था गरिएको उनले बताए ।
‘पूर्णरूपमा जलेर नष्ट भएका सवारीसाधनको लगत कट्टा वा दर्ता खारेजी गर्दा लाग्ने शुल्क मिनाहा गर्ने निर्णय गरेका छौं’, मन्त्री थापाले भने । ‘त्यस्तै, अर्ध जलेका वा मर्मतपछि सञ्चालनमा ल्याउन सकिने सवारीसाधनको हकमा मर्मत सम्पन्न नहुन्जेलसम्मको राजस्व मिनाहा गरिनेछ । साथै, भाद्र २३ र २४ गते राजस्व तिर्न नसक्ने अवस्थामा लाग्ने जरिवाना शुल्क पनि माफी गरिनेछ ।’
त्यसैगरी उनले सवारीसाधन अनुमतिपत्र (लाइसेन्स) छपाईबारे पनि स्पष्ट पारे । मन्त्री थापाका अनुसार लाइसेन्स छपाइ संघीय सरकारको अधिकारभित्र पर्ने भएपनि केन्द्रले अधिकार हस्तान्तरण गरे प्रदेशले छपाइ सुरु गर्न सक्ने कानुनी व्यवस्था रहेको छ ।
‘हामीले केन्द्र सरकारसँग अनुमतिको लागि मुद्रण विभागमा निवेदन दिएका छौं’, उनले भने, ‘स्वीकृति प्राप्त भएको एक महिनाभित्रै प्रदेश सरकारले आफ्नै स्तरबाट लाइसेन्स छापेर वितरण गर्न सक्ने तयारी गरिसकेको छ ।’
उनका अनुसार अघिल्लो आर्थिक वर्षमै बागमती प्रदेश सरकारले लाइसेन्स तथा ब्लुबुक छपाइका लागि पाँचवटा मेशिन खरिद गरिसकेको छ ।
