बागमती प्रदेश सरकारका खानेपानी, उर्जा तथा सिंचाइ मन्त्री एकालाल श्रेष्ठले नेपाल सरकारका उपप्रधान एवम् भौतिक पुर्वाधार तथा यातायात मन्त्री रघुवीर महासेठसँग भेटवार्ता गरेका छन् ।
सोमबार संघीय मन्त्री महासेठ र प्रदेशका खानेपानी मन्त्री श्रेष्ठबीच पुल्चोकस्थित मन्त्रीनिवासमा भेटवार्ता भएको हो ।
भेटका क्रममा मन्त्री श्रेष्ठले हेटौंडा बाईपास सडकको पुर्णताको लागि उपप्रधानमन्त्री महासेठको ध्यानाकर्षण गराएका छन् ।
उपप्रधानमन्त्री एवम् भौतिक पुर्वाधार तथा यातायात मन्त्री महासेठले आफ्नै कार्यकालमा हेटौंडा बाईपास सडकको सुरुवात भएको बताउँदै यसको पुर्णताको लागि सकारात्मक रहेको बताए । छिट्टै नै बाईपास सडक निरिक्षणको लागि हेटौंडा आउने चाहना रहेको सुनाउँदै महासेठले उक्त सडकलाई आगामी वर्षको बजेटमा समावेश गर्ने प्रतिबद्धता समेत व्यक्त गरे ।
उपप्रधानमन्त्री महासेठ र मन्त्री श्रेष्ठबीच हेटौंडा रिङरोड, अन्य क्षेत्रमा पुर्वाधार निर्माण योजना र खानेपानी क्षेत्रका विभिन्न विषयमा समेत छलफल भएको थियो ।
