नेपाली कांग्रेस बागमती प्रदेशले मूख्यमन्त्री तथा मन्त्रीहरुलाई आवश्यकता र औचित्यका आधारमा प्रदेशको पहिचान हुनेगरी नीति तथा कार्यक्रम बनाई बजेट ल्याउन निर्देशन दिएको छ ।
कांग्रेसबाट सरकारमा सहभागी मूख्यमन्त्री तथा मन्त्रीहरुलाई बागमती प्रदेशका ६६ निर्वाचन क्षेत्रमा आवश्यकता र औचित्यको आधारमा बजेट निर्माण गर्न प्रदश सभापति ईन्द्रबहादुर बानियाँले निर्देशन दिएका हुन् ।
मंगलबार हेटौंडामा सम्पन्न कांग्रेस बागमती प्रदेश समिति र संसदीय दलको संयुक्त बैठकमा बागमति प्रदेशभित्र पछाडि परेका भुगोल र सिमान्तकृत, दलित, अल्पसंख्यक, अपाङ्गलगायतलाई निःशुल्क शिक्षा, किसान, महिला र युवा रोजगारलाई समेटेर बजेट ल्याउने विषयमा छलफल गरिएको कांग्रेस बागमती प्रदेश कार्यालयका मूख्यसचिव राजु नेपालले जानकारी दिए ।
‘बैठकमा आएका सल्लाहसुझाव समेटेर नीति तथा कार्यक्रम बनाईनुका साथै आवश्यकता र औचित्यका आधारमा प्रदेशको पहिचान झल्किने गरी बजेट ल्याउने कुरामा मुख्यमन्त्री र अरु मन्त्रीहरु सकारात्मक नै हुनुहुन्छ, अब नीति तथा कार्यक्रम बनाउने र बजेट ल्याउने बेलामा कतिको कार्यान्वयन हुन्छ त्यो हेर्न भने बाँकी नै छ’, साझापत्रसँग कुरा गर्दै प्रदेश सभापति बानियाँले भने ।
