मकवानपुरको बकैया गाउँपालिकाले चालु आर्थिक वर्षको तुलनामा १ करोड ८७ लाख ४९ हजार घटाएर आगामी वर्षको बजेट प्रस्तुत गरेको छ ।
गाउँपालिकाले आगामी आर्थिक वर्ष २०८२/८३ को लागि ९१ करोड ७२ लाख ५० हजार रुपैयाँको बजेट ल्याएको हो ।
पूर्वी मकवानपुरको बकैयाले चालु आर्थिक वर्षका लागि ९३ करोड ५९ लाख ९९ हजार रुपैयाँ बजेट ल्याएको थियो ।
सोमवार उपाध्यक्ष भक्त बहादुर खत्रीले गाउँसभामा आगामी आर्थिक वर्षको लागि चालुतर्फ ६३ करोड ६५ लाख ५९ हजार र पूँजीगततर्फ २८ करोड ६ लाख ९१ हजार बजेट छुट्याइएको जानकारी गराए ।
त्यसैगरी गाउँपालिकाले कृषिलाई प्राथमिकतामा राखेर आगामी बजेट निर्माण गरेको अध्यक्ष धर्मराज लामिछानेको भनाइ रहेको छ ।
बकैयामा कृषि औद्योगिक ग्राम सञ्चालनतर्फ २ करोड तथा कृषि ग्रामको भौतिक संरचना निर्माणतर्फ २ करोड ५० लाख र कोल्ड स्टोर निर्माण गर्न अनुदानसहित एक करोड ३० लाख बजेट बिनियोजन गरिएको अध्यक्ष लामिछाने बताए।
